ppavalamani

விதி

2012-02-03T04:59:00.000-08:00

விதி ஒன்று உருவானால்
விலக்கு ஒன்றும் பிறக்கும்
ஒளியோடு இருளும்
ஆணியோடு சுத்தியலும்
சேர்ந்தே இருக்கும்
நீ கழுவுற நீரில்
நழுவும் மீனாயிரு

அடைவானா

2012-02-01T19:39:00.000-08:00

அடைவானா இலக்கை
சுவைப்பானா தேனை
உச்சிக் கொம்பில் இருக்கு
கூட கொட்டும் கொடுக்கு
கெஞ்சலும் கொஞ்சலும்
கொஞ்சம் கரிசனமும்
கோடிகள் கொடுக்காத
கனிந்த பக்குவத்தை
கொடுக்காதோ காய்த்த
காரிகையின் மனதிற்கு

அவசர சிகிச்சை

2012-01-31T06:57:00.001-08:00

க்ளூக்கோஸ் பெண்ணே
ஸ்டீராய்ட் கண்ணே
பந்தயக் குதிரையாய்
பல்ஸ் எகிறுதே
அவசர சிகிச்சை
அளிக்காவிட்டால்
உயிர் பிரியும் உடனே
பாடியாய் மாறிடுவேன்

கவசம்

2012-01-28T19:14:00.000-08:00

மாது அணிகிறாள் கவசம்
கமழுது அவள் தனி வாசம்
வாய் கூசாமல் ஆண் வீசும்
அதே பழைய அசிங்க வசனம்
இன்னுமா அவளுக்கு காது கூசும்
அமைதியும் அறிவும் அவள் வசம்

ஒரு கதை

2012-01-28T07:27:00.001-08:00

சுவாரஸ்யமாய் இருந்தது ஒரு கதை
வலை மனையில் உலா வந்த கவிதை
பாராட்டத்தெரியாத புருஷன் ஒருவன்
பொழுதுக்கும் புகழ்ந்தான் பெத்தவளை
மட்டம் தட்டியதில் நொந்த பெண்டாட்டி
அவன் அம்மா செய்யாத ஒன்றை சிறப்பாக
செய்திட வீறு கொண்டு எழுந்தாள் ஒரு நாள்
ஓங்கி அவனை அறைந்துவிட்டாள் கன்னத்தில்

ஒலிகள்

2012-01-25T21:41:00.001-08:00

ஒலியின் மொழிக்கு உண்டோ அகராதி
உணர்த்தும் பொருள் உண்டே பல நூறு
உம் என்று பெண் உதிர்க்கும் ஒரு சத்தம்
எச்சரிக்கை மணியடிக்கும் ஆண் மனதில்
ஆ என்றால் அர்த்தங்கள் ஓர் ஆயிரம்
ஏற்றி இறக்கினால் பல உணர்வை சொல்லும்
ஓ என்னும் ஒலிக்குள் ஒளிந்திருக்கும்
வார்த்தையில்லா வலுவான பல சேதி
வக்கணையாய் வரி வரியாய் பேசாமல்
இணைக்கும் பாலம் ஒலிகள் ஆதி முதலாய்

உறவு

2012-01-22T04:55:00.000-08:00

மனப்பூர்வத்துடன் இருவர் இணைவர்
அக்னி சாட்சியாய் நிறைந்த நன்னாளில்
மங்கல நாண் சூட்டி மஞ்சள் திலகமிட்டு
அவை நிறைந்த சுற்றம் உறவின் முன்
மாலை மாற்றி பூரண சம்மதம் சொல்லி
ஆசீர்வாதமுள்ள தேவன் திருச்சபையில்
மோதிரம் அணிவித்து இணைந்திடும் உறவு
முற்றாய் முடிவது பதிவாளர் அலுவலகத்தில்

விழாக்கள்

2012-01-21T23:10:00.000-08:00

சமயங்களில் பூசப்பட்ட வண்ண சாயங்கள்
விதைத்து வளர்ந்த ஏராள சம்பிரதாயங்கள்
மதியை மயக்கி இயந்திரமாக்கும் சக்திகள்
வரிசையாய் வருடம் முழுக்க விழாக்கள்
வரண்ட வாழ்வில் மாயக் கவர்ச்சிகள்
மேன்மை பெற உதவாத மார்க்கங்கள்

பதிகள்

2012-01-21T07:11:00.000-08:00

அவருக்கு கொத்தமல்லி துவையல் பிடிக்கும்
தலை நிறைய மல்லிகைப்பூவை சூட்டி
தழையத் தழைய பட்டுடுத்தினால் பிடிக்கும்
காப்பியில் சீனி தூக்கலாய் இருக்க வேண்டும்
கலைந்து கொண்டிருக்கும் அந்த நாள் சித்திரம்
காணாமல் போய்க்கொண்டிருக்கும் பழைய பத்தினிகள்
அவளுக்கு காப்பி மிதமான சூட்டில் இருக்க வேண்டும்
உடுப்பை சுருக்கமின்றி தேய்த்து வைக்க வேண்டும்
அவள் பேசும் போது குறுக்கிடக்கூடாது சொன்னதை
சிரமேற்கொண்டு கச்சிதமாய் முடித்திட வேண்டும்
கூடச் சென்று வாங்கியதை சுமந்து வரவேண்டும்
கொடுத்துவைத்தவர்கள் பூரிப்பில் இன்று பதிகள்

அறிவிலிகள்

2012-01-18T22:31:00.000-08:00

தொடரினிலே எண்ணற்ற கண்ணிகள்
பொருளுள்ள ஆதாரமான காரணிகள்
ஓரிழையில் கோர்த்த உயிரினங்கள்
அழிக்கக் கிளம்பிய நாம் அறிவிலிகள்

மச்சினி

2012-01-17T05:27:00.000-08:00

மச்சினி பாவம் கத்தி அழுவுறா
கண்ணீரை அருவியா கொட்டுறா
கையைக் காலை உதைக்கிறா
குஞ்சுப் பாப்பா கன்னத்தை
கொஞ்சிய மச்சானின் மீசை
குத்துனதுதான் குத்தமா போச்சு

முடிந்தது

2012-01-16T19:24:00.000-08:00

நாடகமும் முடிந்தது
திரையும் விழுந்தது
கூட்டம் கலைந்தது
அடுத்த வேலை என்ன
அடுப்பில் உலையை வை
இருப்பவர் வயிறை கவனி

முதல் பனி

2012-01-16T05:30:00.001-08:00

பாடம் படிக்கும் மாணவியாய்
பாச மகள் பகிர்ந்து கொண்டாள்
பரவசமான முதல் பனி மழையை
பூப் போல் கையில் விழும் வடிவம்
பொலிவாய் செதுக்கிய நட்சத்திரம்
பொசுக்கென கரைந்துவிடும் மாயம்
பொம்மை மனிதன் செய்யும் கூட்டம்
பாகுபாடின்றி பெரியவரும் சிறாரும்
பளிங்கு போல் எங்கும் ஒரு நிர்மலம்
பரிசுத்தமான நிகழ்வதுவோர் அதிசயம்
பன்முக இயற்கையின் தூய தரிசனம்
பரவிக்கிடந்தது அங்கே ஒரு பயபக்தி

இல்லறவியல்

2012-01-15T18:40:00.000-08:00

உரைப்பாள் பல கதைகள்
கரைப்பாள் பாவி மனதை
மாமி நாத்தியுடன் மனைவி
பிணக்கின்றி வாழ முடியாதா
இல்லறவியல் அறியா பாமரன்
பல கலை கற்றும் கல்லாதவன்

உறுத்துகிறது

2012-01-14T19:37:00.000-08:00

உறுத்துகிறது சிறு தூசு கண்ணுக்குள்
உண்ட ஒரு துணுக்கு பல்லிடுக்கில்
உதித்த ஒரு சந்தேகம் மனதில்
உள்ளிருந்து உயிர் வதைக்கும்

தண்டனை

2012-01-14T04:48:00.000-08:00

பிழை இருந்தது மன்னன் தீர்ப்பில்
விலை தந்தது மதுரை மாநகரம்
நிழலை போல் தொடருமே எந்நாளும்
தவறின் பின்னே தவறாத தண்டனை

உஷாரு

2012-01-12T22:05:00.001-08:00

லிஃட் கேட்ட விரல் வெண்டைபிஞ்சென்றால்
மவனே உஷாரு நேரமோ நட்ட நடு நிசி பாரு
ஐவேயில அழகான மோகினி பிசாசுகளும்
சிங்காரிச்ச ரத்தகாட்டேரிகளும் நிக்குதாம்

நித்திரை

2012-01-11T21:08:00.000-08:00

நித்திரை வருவதில்லை
குத்துப்பட்டவனுக்கும்
குறை வயிற்றுக்காரனுக்கும்
குற்றம் புரிந்தவனுக்கும்
பிறழாத நெறி கொண்டவன்
படுத்தவுடன் உறங்குவான்

யோகமில்ல

2012-01-11T06:45:00.001-08:00

நடிப்பு அத்தனையும் நடிப்பு
மகனிடம் பசப்புறா மாமியா
மண்டூகமாய் நம்பும் மனுஷன்
மாட்டிக்கிட்டு முழிக்கிறா பாவி
முக்காக் கிழவிக்கு யோகமில்ல
முடிஞ்சிக்க முடியல முந்தானியில

அட்டைக்கத்திகள்

2012-01-10T21:06:00.001-08:00

ஆண்கள்தான் இங்கு ஆழ் உறக்கத்தில்
சுற்றும் பூமியில் எத்தனை சுழற்சிகள்
ஆயின் இவரோ கிணற்றுத்தவளைகள்
காண்பது மிடுக்கான மிராசுக் கனவுகள்
வீசுவது அதே ஆபாச வசவு வார்த்தைகள்
அரதப்பழசான அந்த ஆணாதிக்க ஆயுதங்கள்
அவையோ இன்று வெறும் அட்டைக்கத்திகள்
எப்பவோ தொலைந்தன தொழுவத்து மாடுகள்

ஒரு தோள்

2012-01-09T22:33:00.000-08:00

கூட்டம் வேண்டுமா கொண்டாடிக் களிக்க
அணிகலன் அலங்காரமுடன் அளவளாவ
அறுசுவை விருந்துண்டு மகிழ்ந்திருக்க
மனம் லேசாகி கவலைகள் மறந்துவிட
தன்னம்பிக்கையும் தெம்பும் ஊற்றெடுக்க
போதுமே அழ ஆதரவாய் ஒரு தோள்

பாவி மனிதன்

2012-01-07T09:33:00.000-08:00

எங்கே உளது உணவென்று
உயிரினங்கள் முகர்ந்துவிடும்
வண்டறியும் தேன் இருக்கும்
மலர்களின் இருப்பிடம்
வீசும் நறுமணத்திலே
இரவு மலர்களின் வெண்மை
எளிதாய் கண்டுபிடிக்கவே
தேனை கொடுப்பதின் விளைவு
மகரந்த சேர்க்கையல்லவோ
தானும் பிழைத்துப் பெருகி
தன் சங்கிலி கண்ணிகளும்
வலுவாய் நலமாய் தொடர
அமைந்த அழகிய ஒழுங்கை
குலைக்கிறான் பாவி மனிதன்

நானாகத்தான்

2012-01-07T06:29:00.000-08:00

நான் தான் முட்டாளோ
முதல் ஆளாய் வந்துவிட்டு
முழிக்கிறேன் நேரம் தவறாமை
மறந்த விழாக் கூட்டத்தினர் முன்
முதல் ஆளாய் கண்டிக்கிறேன்
கண் முன்னே அக்கிரமம் நடக்கையில்
மௌனமாய் மற்றவர் பார்க்கையில்
முதல் ஆளாய் கொதிக்கிறேன்
கலாசாரம் காற்றில் பறக்கையில்
கைதட்டி பிறர் அதை ரசிக்கையில்
கேவலமில்லை இந்த மௌடீகம்
நான் இருப்பேன் நானாகத்தான்

திரவியம்

2012-01-05T23:11:00.000-08:00

புண்ணியம்தன்னைத் தேடித் தேடி
கோவில் கோவிலாய் சென்று
குளங்களில் தவறாது புனித நீராடி
திருவோடுகளில் சில்லறை வீசி
உண்டியலில் காணிக்கை செலுத்தி
பக்திப்பழமாய் பரவச கோலம்
நெஞ்சில் ஈரம் இன்றி அதிகாரம்
பொருளுக்கும் புகழுக்கும் பேராசை
பெருக்கியது பணமா புண்ணியமா
காலமறிந்து செய்யும் உதவி
ஓசையின்றி வழங்கிய நிதி
கல்விக்கண் திறக்க விரும்பி
பச்சை வளம் பூமியில் காத்து
தீய சிந்தனை செயல் ஒழித்து
தேடிய புண்ணியம் திரவியம்
தலைமுறைகள் அதில் வாழும்

சிறு மீன்

2012-01-04T06:18:00.001-08:00

வேறு பக்கம் பார்க்கிறாள்
விட்டேத்தியாய் பேசுகிறாள்
வெறுப்பேத்துகிறாள் வீம்பாய்
வினைகாரியின் விளையாட்டிது
விழி பிதுங்கும் விபரீத சதுரங்கம்
விளங்கவில்லை அடுத்த நகர்வு
விக்கித்து வேர்த்து நிற்கிறேன்
வஞ்சியின் வலைக்கு தப்புவதுண்டோ
விலாங்கும் வஞ்சிரமும் வாளையும்
வினயமில்லா சிறு மீன் நான் பாவம்

இரவும் பகலும்

2012-01-03T21:30:00.001-08:00

சோகம் அறியாவிடில் சுகம் இனிக்குமா
வெயில் இல்லாமல் நிழல்தான் குளிருமா
உப்பு உரைப்பில்லாமல் சமையல் ருசிக்குமா
இரவும் பகலும் வானத்தில் வருவதுண்டு
இடரும் இன்பமும் நாணயத்தின் இருபக்கமே
ஒன்றில்லாமல் ஒன்றுக்கு மதிப்பில்லையே

பக்குவம்

2012-01-02T20:42:00.000-08:00

இருக்கும் இல்லத்தில் இன்பமும் ஒளியும்
பிறக்கும் ஒவ்வொரு ஆண்டும் நாளும்
புதிய வாய்ப்புகளின் அரிய பெட்டகம்
என்றெண்ணும் பக்குவம் கனிந்தபின்னே

இன்பம்

2012-01-02T20:41:00.000-08:00

இருக்கிறதா இன்னும்
இடையினில் தேடல்
இடைஞ்சலாய் ஊடல்
இருவரின் விளையாடல்
இன்பம் திகட்டுவதில்லை
இயற்கை பின்னும் வலை

தமிழ்

2011-12-31T07:55:00.000-08:00

தமிழ் அறிவாள் பல நாகரிகம்
அவள் அலங்காரம் பலவிதம்
காலத்திற்கேற்ப மாறும் கோலம்
பல்லை உடைக்கும் இலக்கண நடை
பாகாய் இனிக்கும் மணிப்பிரவாளம்
வட்டார மொழியென அங்கங்கே தளுக்கி
ஊடக வழி வித விதமாய் மினுக்கி
விடலைகள் உதடுகளில் தத்தளித்து
இன்று ஆங்கிலக் கடலில் மூழ்கினாள்
முத்துக்குளிக்கவோ மரணிக்கவோ

சிறு பிள்ளை

2011-12-31T03:03:00.000-08:00

சூரியன் சுட்டெரித்தால் பிடிக்கவில்லை
சூரியன் விடுப்பில் சென்றால் பிடிக்கவில்லை
மழையும் பனியும் காற்றும் பிடிக்கவில்லை
எதுதான் பிடிக்கும் என்றும் தெரியவில்லை
சிறு பிள்ளை மனக்குறைக்கு ஏது எல்லை
வருடங்கள் பறந்தாலும் மாறாதோ இந்நிலை

கலிகாலம்

2011-12-29T08:11:00.000-08:00

காலம் கலிகாலம் ஆனதே
எழுதியவன் ஏட்டை கெடுக்க
பாடியவன் பாட்டை கெடுக்க
உலகத்தை கொலைவெறி பிடிக்க
எதுவுமே இங்கு புரியவில்லை
அனர்த்தம் தலைவிரித்தாட
அநாகரிகம் அதை ரசித்திட
புதிது புதிதாய் பிறக்கும்
அபத்தங்கள் பெருக பிறக்கும்
புது வருடம் புது வெள்ளத்தில்
புரட்டியடிக்குமோ புனரமைக்குமோ
இளைய தலைமுறையினரை
மாறுமோ மந்தை சிந்தனை
உடையுமோ வெத்துக் குமிழிகள்

அழுகை

2011-12-29T02:55:00.000-08:00

அழுகை அவசியமான செயலே
அந்தரங்கம்தான் அதன் அழகே
அழுத்தம் நீக்கி அழுக்கை கழுவி
அமைதியை தரும் வைத்தியமே
அவையில் அழும் பலர் பொய்யர்கள்
அதில் முதலை கண்ணீர் ஒரு ரகம்
அமங்கல வீட்டிலோர் சம்பிரதாயம்
அங்கே அவலமாகும் ஒரு புனிதம்

நிகர லாபம்

2011-12-28T20:17:00.000-08:00

அட்டவணைப்படி உண்டு உறங்கி
அளவாய் எதையும் அனுபவித்து
ஆரோக்கியத்தை கணக்காய் பேணி
ஆயுளை நீட்டித்து அறிவோடியங்கி
அடைந்த நிகர லாபம்தான் என்ன
அமைதியா ஆனந்தமா ஆயாசமா

மனம்

2011-12-28T01:54:00.001-08:00

மனம் இருக்கவேண்டும் ஒரு பூந்தொட்டியாய்
ஆனால் குரங்கது ஆகுது குப்பைத்தொட்டியாய்
ஓயாமல் அலையடிக்கும் ஆசாபாசங்கள்
ஒப்புக்கொள்ள மறுக்கும் நியாய தர்மங்கள்
இப்புயலில் சிக்கிய சிறு பாய்மரக்கப்பலதை
உல்லாச ஊஞ்சலாய் ஆடவைக்க கற்பதெப்படி

அந்த பகவதி

2011-12-27T19:35:00.000-08:00

நாயரை அறியாத நாடுண்டோ
நாவிற்கு சுவையான தேனீரும்
நல்ல மசால் வடையும் விற்கும்
நாட்டுநடப்பை அலசும் இடமாய்
நன்குணர்ந்து மகிழாத பேருண்டோ
நட்பும் நேசமும் நெருக்கமும் இன்று
நசிந்தது ஏனென்று ஞான் அறியேன்
நல்வாக்கு பறையணும் அந்த பகவதி

வழிகாட்டல்

2011-12-27T06:42:00.001-08:00

இவன் தூங்கினால் எழுப்பலாம்
நடிப்பவனை என் செய்யலாம்
கண்ணை மூடிக்கொண்டால் தூக்கமா
உலகம் இருண்டதாயெண்ணும் பூனையா
ஊர் குறட்டை விடும் வேளையிலும்
துடிப்புடன் உழைப்பவர் வழிகாட்டல்
தேவை என்றும் மானிடம் தளைத்திட
தூக்கம் இன்று தொலைவது பலருக்கு
பொல்லாத போக்குகள் பலவும் பழகியதால்
தலைவர் யார் கயவர் யார் தெரியவில்லை

வளங்கள்

2011-12-26T06:33:00.001-08:00

மழைக் காதலன் வருகிறான் விரைவாக
வருடுகிறான் விரல்களால் ஆதுரமாய்
மயங்கி மலர்கிறாள் மண்மங்கை நல்லாள்
வளங்கள் வழிகின்றன பூரித்த பூமியிலே

உள்ளவன்

2011-12-21T17:21:00.000-08:00

உள்ளவன் சுமக்கிறான் பொறுப்பு
செல்வம் செழுங்கிளை தாங்க
மேதமை இம்மானிடம் ஓங்க
தைரியம் முன்னால் நடக்க

நிலைக்காது

2011-12-21T08:49:00.000-08:00

நிரந்தரம் என நினைத்து ஆணவம்
நிலைமை புரியாமல் அட்டகாசம்
நின்று யோசிக்காமல் அவசர ஓட்டம்
நிலைக்காது இந்த வெத்து ஆட்டம்

சாத்தியமா

2011-12-21T06:05:00.000-08:00

அனைவருக்கும் திருப்தியா
அப்படியொரு தீர்வு உளதா
அது என்றும் சாத்தியமா
தாத்தன் பேரன் கழுதை
பயணித்த கதை சொல்லும்
சமுதாயத்தின் இயல்புதனை

புத்தகம்

2011-12-15T22:15:00.000-08:00

நேற்றில் மட்டும் வாழ்ந்தேன் நேற்று
இன்றில் மட்டும் இருக்கிறேன் இன்று
படிக்காத பக்கங்கள் இன்னும் எத்தனை
புரட்டும் இப்புத்தகமிதில் இதுவரை
முடிந்த அத்தியாயங்கள் நிறையத்தான்
நடந்த நாடக காட்சிகள் ஏராளம்தான்
எத்தனை திருப்பங்கள் எத்தனை மர்மங்கள்
எதிர்பாராத நிகழ்வுகள் கிளறிய ஆர்வங்கள்
ஆச்சர்யங்கள் ஏமாற்றங்கள் நிறைவுகள்
புதிது புதிதாய் தோன்றின கதாபாத்திரங்கள்
காணாமல் போயின பல நட்சத்திரங்கள்
கண்ணுக்குத் தெரியாத விரல்கள் இயக்கும்
கருத்தைக் கவரும் அதிசய பொம்மலாட்டம்
பொதுவாய் புரியக்கூடிய கதையோட்டம்
அடிமனதில் படியும் ஒரு ஆற்று வண்டல்
அதில் வளரும் வளமான கற்பனைகள்
பட்டின் இழையாய் ஊடூறுது ஒரு கரு
அதன் அர்த்தம் தேடுது என் மனது
நோகாமல் உதிரும் காய்ந்த சருகு
அதுபோல் அமைதியான முற்றுப்புள்ளி
கதையின் முடிவில் காத்திருக்கும் என்ற
கனவில் கணங்கள் கடிதாய் விரையும்

குரங்கு

2011-10-31T19:14:00.001-07:00

குரங்கும் அதன் குறுகுறு கண்களும்
குட்டியை கவ்விச் செல்லும் பாங்கும்
தவழும் நீண்ட அழகிய வாலும்
மெத்தென்ற சிறு கைவிரல்களும்
கூட்டமாய் வாழும் ஓர் ஒழுங்கும்
ஈர்க்கும் சங்கதிகள்தான் எத்தனை

பண்டிகை

2011-10-25T21:53:00.000-07:00

காலம் காற்றாய் அல்லவோ பறக்கிறது
குட்டிப் பெண் அன்று பட்டுப்பாவாடையில்
பாட்டி வீட்டில் செட்டுப் பிள்ளைகளுடன்
கொட்டமடித்தது அதிரச இனிப்பு
குமரியாய் உறவுகளை சந்தித்த
கொண்டாட்டம் குலாப்ஜாமுன் தித்திப்பு
மறுவீடு சென்று இரு வீட்டு சீராடியது
மனம் நிறைந்த மைசூர்பாகின் சுவை
மக்களைப் பெற்று அவர் ருசிக்குக் கிளறியது
மங்காத மகிழ்ச்சி தரும் பாதாம் அல்வா
பேரப்பிள்ளைகள் கொறிக்க முறுக்கும் மிக்சரும்
பேரின்பம் தரும் போளியும் பாதுஷாவும்
அக்கரையிலும் தொலைதூர பணியிடங்களிலும்
மக்கள் இன்று - மாட்டிக்கொண்டோம் தனித்தீவில்
கடையில் வாங்கிய பலகாரம் போதுமென
அக்கம் பக்கம் பகிர்ந்துண்டு அருகிருக்கும்
பழுத்த மர நிழலில் சற்றே ஆசுவாசம்
பெற்றவரை பார்த்து ஆசி பெறுதல் பணியாரம்
பண்டிகை கொண்டாடியதாய் நீயும் இன்று
பேர் பண்ணிக்கொள் மனமே வேணாம் பேராசை

என் இடத்தை

2011-10-23T03:16:00.001-07:00

மிகவும் யோசித்து
மிகவும் தயங்கி
மிகவும் மென்மையாய்
மீட்டேன் என் இடத்தை

தலைவலி

2011-10-20T08:40:00.001-07:00

பெரிது என்பது எது
சிறிது என்பது எது
பெரிதென நினைத்த கோடு
சிறிதாகும் அதை விட
பெரிய கோடு அருகில் வர
பெரிதும் சிறிதும் மாறும்
சூழ்நிலைக்கு தக்கபடி ஆயினும்
தலைவலி தலைவலிதானே

பொருத்தம்

2011-10-19T22:18:00.000-07:00

புகைப்படத்தில் பார்த்த பின்பு
ஜாதக பொருத்தமும் அறிந்து
சொஜ்ஜி பஜ்ஜி சாப்பிடச் சென்று
பாடச்சொல்லி கேட்டு பலருமாய்
சிலபல லௌகீக பேரங்கள் நடத்தி
மண்டபமும் தேதியும் முடிவாகும்
காலம் கடந்துவிட்டதோ இனி
பெரியவர் வேலை முடிந்துவிட்டதோ
இணையமும் கல்லூரிசாலைகளும்
இணைந்து இயங்கும் பணியிடங்களும்
மாலும் காபிஷாப்பும் டிஸ்கோவும்
மாலை சூட பொருத்தம் காட்டுமோ

காவியக் கதை

2011-10-10T06:05:00.001-07:00

மயில்கள் ஆடும் அழகிய வனத்திலே
மலர்ந்த மங்கை பெயரும் சகுந்தலை
மகிழ்ந்தாடிய கலாப காதலன் மன்னன்
விளைந்தது பாரத விருட்சத்தின் விதை
மறந்துவிட்டான் கொடுத்த கணையாழியை
மீனின் வயிற்றில் மறைந்திருந்ததந்த சாட்சி
மறதி விலகும் காலம் வந்ததும் மங்களம்
காளிதாசன் வரைந்திட்ட காவியக் கதை

பாக்கியம்

2011-10-09T02:33:00.000-07:00

இளமையாய் மனசிருக்கு
எண்ணத்தில் துள்ளலிருக்கு
ஆனாலும் என்ன செய்ய
சபையில் நுழையும்போது
முடியில் பரவிய நரையும்
முகத்தில் முதிர்ச்சியும்
முன் வந்து கிழவியென
கட்டியம் கூறுதே
ஆயின் சில நொடி பேச்சில்
தெளிவாய் புரிந்துவிடும்
கிழவியல்ல குமரியென
இன்னும் கூட குழந்தையென
குறை தீர்ந்திடுமெனக்கு
போதும் இந்த பாக்கியம்

வாடிக்கை

2011-10-07T10:26:00.001-07:00

பதில் வந்தது அம்பாய்
சுவற்றில் அடித்த பந்தாய்
கேட்டிருக்க வேண்டாமோ
காலங்கடந்து வந்த ஞானம்
முடியில்லா தலைக்கு சீப்பு
இதுதானே இங்கு வாடிக்கை

குறும்பாய்

2011-10-04T02:53:00.000-07:00

மாமி நான் மாமாவின் மடியில் அமர்வதை தடுக்கமாட்டாயே
மணப்பெண்ணிடம் குறும்பாய் கேட்ட போது கோபம் வரவில்லை
வாழ்த்துமடலில் அப்படி விண்ணப்பித்தவள் வேறு யாருமில்லை
அருமை நாத்தனாரின் அழகிய மூன்று மாதக் குழந்தைதானே

பரவசம்

2011-10-02T06:33:00.001-07:00

பிரமையில் நானோ
பகல் கனவுதானோ
பிறந்த பலனிதுவோ
பொற்காலமிதுவல்லவோ
பாரெங்கும் நல்லொழுக்கம்
பகையில்லா நெருக்கம்
பார்த்தாலே பரவசம்
பாலில் விழுந்தது பழம்

காதல்

2011-10-02T02:23:00.000-07:00

நாக்குதான் குழறியது
வாய் கூட உளறியது
கவிதை மறந்துபோனது
காதல் பறந்தேபோனது
கயவனுடன் பார்த்தபோது
கற்பனை நொறுங்கியது

(அ)நாகரிக பதர்கள்

2011-09-28T07:17:00.000-07:00

பிள்ளை வளர்க்கப் பொறுமையில்லை
பெரியவர் பேணிடப் பிடிக்கவில்லை
பெரிதாய் சமூகநல கொள்கையில்லை
பிடித்து வைக்க ஒரு கட்டுப்பாடில்லை
யாருடனோ அவள் தனியே அவன் தனியே
எங்கோ களிக்கின்றனர் குடியும் கூத்துமாய்
பருவமடைந்ததும் துவங்குது இப்பழக்கம்
போதை ஏறி ஆடி முடிவாய் எங்கு எவருடன்
புரண்டு எழுந்தோமென சுத்தமாய் மறந்து
பகலுக்குப் பின் இரவு இப்படியே தொடர்ந்து
புதிய சரித்திரம் சமுதாயம் படைக்கின்ற
புல்லுருவிகள் இவர்கள் (அ)நாகரிக பதர்கள்
புலனின்பமன்றி வேறொன்றறியா உயிரினங்கள்
பகுத்தறியா இவர்கள் பெரும் படிப்பாளிகள்
பேரழிவுப் புயலின் நிச்சய புள்ளி மையங்கள்
புரையோடிப் பரவும் பயங்கர நச்சுக் கிருமிகள்
பட்டணம் துவங்கி பட்டிக்காடடையும் நோய்கள்
புற்றாய் பீடித்த நாசகார நண்டுக்கொடுக்குகள்
பொரித்தெடுப்பாரோ இவர்களை எண்ணெய் கொப்பரையில்
போட்டு வைப்பாரோ பொசுக்கும் அணையா செந்தழலில்
போகட்டும் நரகத்திற்கோ வேறெங்கோ பொருட்டில்லை
பொறுக்கலாமோ நரகமாய் நாட்டை வீட்டை ஆக்குவதை

நம்பிக்கை

2011-09-27T09:14:00.001-07:00

இருக்கிறது நம்பிக்கை
இரவில் படுக்கும்போது
இன்னொரு நாளை பார்க்க
இமைகள் திறக்குமென்று

பாவி

2011-09-27T03:20:00.000-07:00

நினைவுகளால் முகம் சிவந்து
கனவுகளால் அதை எதிர்பார்த்து
தீட்டி தீட்டி தினம் கூரேற்றி
பழிக்குப் பழி வாங்கும் பாவி

நெறி

2011-09-27T02:58:00.000-07:00

வாழ்க்கையை வாழ்ந்து பார்
வழக்கை வாதிட்டு வெல்
வழவழ கொழகொழ வேணா
வழுவாத நெறி உடனிருக்கட்டும்

இரண்டெழுத்து

2011-09-24T01:35:00.001-07:00

எழு இரு கண் வழி ஆணை
சரி ஆண் சொல் ஒரே விடை
துணை ஆசை எது யோசி
மனை ஏடு இதை வாசி
அத்தனையும் இரண்டெழுத்து
பிரணவம் துவங்கி ஒலி
பிரபஞ்சம் முழுதும் கேள்
ஆக்கம் செய்யும் இனிய எண்

விளையாட்டு

2011-09-23T21:21:00.000-07:00

கரங்களில் ஒழுகி ஓடும் குறுமணல்
குழந்தையின் கடற்கரை விளையாட்டு
கரைவது வாழ்வின் கணத்துளிகள்
கடைசி வரை களிப்புடன் விளையாடு

தந்திரம்

2011-09-22T19:54:00.000-07:00

தந்திரம் போல் சிறந்த ஆயுதம் உண்டோ
மிருக பலமா மூளை பலமா வெல்வதெது
காட்டில் நரியும் நாட்டில் சாணக்கியருமறியும்
சமயோசிதம்தனை சிறு குழந்தையுமறியும்
சாகசமான பெண்மணிகளும் கடைபிடிக்கும்
சத்தியமான சாத்தியமான உதவியன்றோ

சவால்

2011-09-19T20:20:00.000-07:00

சுவாரஸ்யம்தான் இருக்குமோ
சுலபமான வெற்றிகளில்
செக்குமாட்டுத் தடத்தில்
தெரிந்த கதை முடிவுகளில்
தெளிவாய் விரியும் பாதையில்
வேண்டும் சவால் எதிலும்

காகிதப் பட்டம்

2011-09-19T03:07:00.000-07:00

கறங்கும் காகிதப் பட்டம்
மனதில் கொண்டாட்டம்
நூலை பிடித்தவன் நாட்டம்
இருக்கும் வரைதான் ஆட்டம்

உலகு

2011-09-18T20:19:00.000-07:00

தேர் கொடுத்தான் பாரி முல்லைக்கு
போர்வை தந்தான் பேகன் மயிலுக்கு
எச்சில் கையால் காகம் ஓட்டாதவனும் உண்டு
இரவும் பகலும் சேர்ந்து இயங்குவது உலகு

மாயை

2011-09-16T07:19:00.001-07:00

குருவியைக் காணோம்
கவலையெனை வாட்டுது
சாதாரண சின்னப்பறவை
என் பேரன்கள் பாராதவை

கண்ட மாற்றங்கள் எத்தனை
குருவி தொலைந்தது வேதனை
சௌகரியமாய் வாழ்கிறோமாம்
அழிவின் அருகாமையறியா மாயை

பலன்

2011-09-16T01:03:00.000-07:00

பொழுது போவதைத் தவிர
பலன் இன்னும் பல இருக்கு
பச்சைப் புல்லில் சிறிது நேரம்
பூனைத் தூக்கம் போட்டபின்பு
பாதம் புதைய மணலில் நடந்து
பல கணம் கடல் நீரில் நின்று
பரவசமாய் மாலையில் மயங்கி
பஞ்சாய் மனம் லேசாகி பறக்க
பகையும் புகைச்சலும் மறைய
பட்டாணி சுண்டல் வேர்க்கடலை
பஜ்ஜி பொரித்த சோளமும் தின்று
புத்துணர்வோடு எழுந்து நடந்து
புலரும் புதுக் காலையின் சவால்களின்
பயம் தொலைத்து கூட்டை அடையலாம்

கதை

2011-09-15T10:59:00.000-07:00

மீறாமல் விதிகளை மீறாமல்
வாகனம் சென்றால் விபத்தில்லை
கூறாமல் காதலை கூறாமல்
மங்கை மறைத்தால் வாழ்வில்லை
முடியாமல் கதை முடியாமல்
தொடர்ந்தால் புதிது பிறப்பதில்லை

சம்பிரதாயம்

2011-09-15T01:19:00.000-07:00

வாழை மரம் தோரணம்
வாசலில் வண்ணக்கோலம்
வா வாவென்று அழைக்கும்
வாசனை சந்தனம் பூ கல்கண்டு
வாய் நிறைய புன்னகை
வரவேற்பு அமர்க்களம்
வந்தவர் மனம் நிறையும்
விமரிசையாய் திருமணம்
விருந்தும் மிகப் பிரமாதம்
வாழ்க நம் சம்பிரதாயம்

ஊடல்

2011-09-13T19:59:00.000-07:00

ஊடல் தகுமோ கற்பனையே
கோடி வார்த்தை காத்திருக்கே
கவிதை கொட்ட வேண்டாமோ
மேகத்துள் நிலவு மறைய
கூம்பாதோ அல்லி மனது
போதும் உன் விளையாட்டு

பரப் பிரம்மம்

2011-09-10T06:22:00.001-07:00

பரப் பிரம்மம் போலிருடா பதி நீ
அவள் அடிக்கட்டுமே இடிக்கட்டுமே
தலையில் குட்டட்டுமே திட்டட்டுமே
பட்டினி போடட்டுமே பொங்கட்டுமே
சிறை வைக்கட்டுமே சீறட்டுமே
கல்லாய் மனிதன் ஆனபின்னே
நால்வகை படை தோற்றிடவே
பாவப்பட்ட நிலை தான் சதிக்கு

கர்வம்

2011-09-09T18:42:00.000-07:00

கர்வம் ஓங்கி வளரத்தான் செய்யும்
வாரிசை தன் அச்சாய் காண்கையில்
நடை பாவனை ரசனை குணம் குறை
அத்தனையையும் அப்படியே பிரதிபலிக்கையில்-
விதை ஒன்று போட சுரை ஒன்று முளைக்காது-
சின்னஞ்சிறு கிளியை உச்சி முகராதோர் உண்டோ

மௌனம்

2011-09-08T06:54:00.001-07:00

மௌனம் தான் வலிய தொடர்பு சாதனம்
விடிய விடிய பேசியது சந்தித்த புதிதில்
புரிதல் வளரும் வருடங்கள் பறக்கையில்
வார்த்தைகள் வீணாகும் அத்வைத நிலை

பாரம்பரியம்

2011-09-07T18:46:00.000-07:00

வைத்து விட்டுப் போகலாம் அடையாளத்தை
நடந்த பாதையில் அழியாத ஒரு கால் தடத்தை
அரிய பெரிய சாதனைகள் செய்திட வேண்டாம்
அழகிய பாரம்பரியம் அழியாமல் காத்திடு போதும்

அனுபவி

2011-09-06T00:08:00.001-07:00

வாங்கு கடனை
அனுபவி உலகை
சுகங்கள் எத்தனை
அனைத்தும் உனக்கே
போனால் வராது
வாழ்வது ஒருமுறை
இன்றே இப்போதே
சுவைத்து முடித்திடு

சிரித்தால்

2011-09-05T19:41:00.000-07:00

சிரித்தபடி பள்ளியறைக்குள் செல்கிறாளே
பந்தாய் திரளுது பயம் வயிற்றுக்குள்ளே
பொங்குவதுண்டு எரிமலையாய் கோபத்திலே
பொறுத்திருந்தால் அடங்கும் கொஞ்ச நேரத்திலே
புனலாய் கண்ணீர் பெருகுவதுண்டு சமயத்திலே
பதமாய் பேசியே சமாளிக்கலாம் அப்பொழுதிலே
பழிகாரி சிரித்தால் ஆபத்தான மர்மந்தானே
பரிதவிக்க வைத்தாளே பெரும் திகிலிலே

அவசியம்

2011-09-03T20:00:00.001-07:00

அவசியம் கண்டுபிடிப்பின் காரணி
நெருக்கடியில் மூளைக்குள் மின்சாரம்
அரிய உத்திகள் அப்போது பிறக்கும்
அது ஒரு சிலிர்க்கும் ஆனந்த அனுபவம்
மனிதனின் சாதிக்கும் வல்லமை நிரூபணம்
அதனால் சவால்களே சளைக்காமல் வருக

ஜான்சன் விளம்பரம்

2011-09-02T19:06:00.000-07:00

அப்பாவிற்கு என்ன தெரியும்
சிறிய சேயும் இளைய தாயும்
சேர்ந்து சிரிக்கும் காட்சி
இயற்கையான ஒரு மகிழ்ச்சி
அதை அப்படி அர்த்தமாக்கியது
அழகிய ஜான்சன் விளம்பரம்

ஆணவம்

2011-08-31T05:29:00.000-07:00

ஆணவம் என்ன செய்யும்
கண்ணை மறைக்கும்
கருணை மறுக்கும்
குழிக்குள் தள்ளும்
குலத்தை அழிக்கும்
முள்முடியது அணியல்ல

நிழற்படங்கள்

2011-08-28T23:49:00.001-07:00

இறைவனும் இறைவியும் சேர்ந்து ரசிக்க
உலகத் திரையரங்கில் எத்தனையோ
நிழற்படங்கள் எதிர்பாராத திருப்பங்கள்
திகிலுடன் சாகசம் நகைச்சுவை உருக்கமென
நவரச வேடிக்கைகள் விரிகையில் அவரே
திகைத்து எழுதிய கதை வசனம் மறப்பரோ

மருந்து

2011-08-28T18:18:00.001-07:00

கலந்து ஊற்றிய மருந்து
காரிகையெனும் ஒரு விருந்து
வஞ்சம் பிடிவாதம் பொறாமை சூது
இன்னும் பல அரக்கப் போக்கு
ஒவ்வொன்றும் இத்தனை அவுன்சு
பழைய சினிமா பாட்டில் கேட்டது

சத்தியம்

2011-08-27T09:08:00.000-07:00

கையில் உள்ள ஒரு பறவை
புதரில் உள்ள இரண்டினும் உத்தமம்
இருப்பதை விட்டு பறப்பதற்கு
அலைவது அறிவீனமென்பது சத்தியம்

நடித்தவன்

2011-08-25T02:51:00.000-07:00

செவி மடுக்கும் பாவனையில்
உதிரும் பல 'உம்', 'அடடா'
ஆர்வமாய் அவனிடம் கொட்ட
கோடி கதை அவளிடமிருக்க
தன்னை மறந்து கணினியில்
அவன் லயித்திருக்க அதை
அவளும் உணர்ந்து மடக்க
நடித்தவன் முழிப்பது திருதிரு

ஒரு சொல்

2011-08-24T19:33:00.001-07:00

சொல் ஒரு சொல்
முடியாது
மாட்டேன்
போடா
லூசு
ஏதாவது ஒன்று

கன்னுக்குட்டி

2011-08-23T09:18:00.001-07:00

கன்னுக்குட்டி துள்ளுவதை
கண்டாலே மனம் துள்ளுவதேன்
கள்ளம் கபடில்லை அதனிடம்
காலம் இருக்கு பதவிசு வந்திட
கவலை தெரியாத பருவம்
கடிதாய் முடிந்திடுவது பாவம்

சின்ன மழையே

2011-08-23T05:45:00.001-07:00

என்சொல்ல
சின்ன மழையே
செல்ல மழையே
சுகமாய் தூவு
செடியோடு நானும்
சிலிர்க்கின்றேனே
சில்லென்று மனது
சிரிக்கின்றதே நிதம்

வாழியவே

2011-08-22T02:16:00.001-07:00

விடைத்தாளை விசிறியடிக்கும் ஆசிரியருண்டு
அழகாய் திருத்தி பாராட்டி தெளிவாய் விளக்கிடும்
உயர்ந்த வழிகாட்டிகளும் உண்டு வகுப்பறையில்
விளைநிலத்தை பண்படுத்துவோர் வாழியவே

கருமம்

2011-08-21T19:10:00.001-07:00

எக்காலம் எது நடக்கவேண்டுமோ
அக்காலம் அது நடந்தே தீரும்
பலனை எண்ணாது கருமம் செய்திட
பளுவாய் எதுவும் தெரிவதில்லை

விவகாரம்

2011-08-21T10:16:00.000-07:00

வெறுப்பே காட்டாத முகங்கள்
வேற்று மனிதர் பல்லிளித்தாலும்
விகாரமாய் கண்ணால் மேய்ந்தாலும்
வேண்டுமென்றே கேள்விகள் கேட்டாலும்
விரலால் தொட்டு நோட்டம் போட்டாலும்
விரசம் ததும்பும் வித வித பாவனைகளும்
வாங்குகிற சம்பளப் பணத்திற்காக
வெளிக்காட்ட முடியாத விவகாரம்

பேறு

2011-08-20T23:31:00.001-07:00

போ என்றவுடன் போகாமல்
வா என்றவுடன் வராமல்
தரும் தொல்லை தீராமல்
இருக்கும் ஆயர்பாடி கண்ணன்கள்
இல்லாத இல்லங்கள் உண்டோ
யசோதையின் பேறு மிகப்பெரிது

துன்பங்கள்

2011-08-20T18:48:00.001-07:00

கூட்டமாய் தான் படையெடுக்குமாம் துன்பங்கள்
ஒத்தை வரிசையில் வராதாம் மோதிப் பார்க்க
மெத்த சரியாகத்தான் சொன்னார் ஷேக்ஸ்பியர்
தன்மானமும் தன்னம்பிக்கையும் துவளவிடாதே

புளங்காகிதம்

2011-08-20T08:05:00.000-07:00

உணர்த்திட்டார் ஒரு 'உம்'மில்
உப்பும் உரைப்பும் கச்சிதம்
பக்குவமான நல்தாளிதம்
ருசியும் மணமும் அதிகம்
கண்மை கரைய சமைத்தவள்
அடைகிறாள் புளங்காகிதம்

ஆணினம்

2011-08-20T03:48:00.000-07:00

குந்தகமாம் தூக்கத்திற்கு
கணவனின் குறட்டை சத்தம்
கோர்ட்டுக்கு போவாள் வெள்ளைக்காரி
கோபமாய் மணவிலக்குக் கோரி
கொண்டையை பிடித்து உலுக்கி
காலால் மிதித்து உதைத்து
கொடுமை பல செய்தாலும் இங்கே
கொண்டவனை கும்பிடுவாள் குலமகள்
கொட்டும் மழை அவள் வார்த்தைக்கு
குருட்டு நம்பிக்கையில் வளமாய் ஆணினம்

தேர்தல்

2011-08-19T19:37:00.001-07:00

அதிகமாம் மக்கள் ஆதரவு
ஆணவமாய் எண்ணியது
பொய்யாய் போனது கணக்கு
பொங்கி எழுந்தது ஊர்சனம்
மிரட்டியதும் சுரண்டியதும்
போதுமென சொன்ன தேர்தல்

புதிய தலைமுறை

2011-08-19T10:31:00.000-07:00

நிறுத்துவார்கள் சீண்டலையென
பொறுமை காத்தாள் புது மருமகள்
புரிந்துகொண்டாள் கொண்டவனவர்கள்
கைப்பாவையாய் இயங்குவதை
புரிதலில்லா துணையுடன் இது
நரகமென்று விலகித் தீவானாள்
இருந்தும் இல்லாத இந்த அவலம்
புதிய தலைமுறை காணாதது

கோர தாண்டவம்

2011-08-19T07:34:00.000-07:00

புரியுமா இன்றைய புத்திசாலி மனிதனுக்கு
பூமி ஏன் வெப்பமானது மழை ஏன் மாறுது
சுனாமியும் சூறாவளியும் ஏன் வருகுது
வீடிழந்த யானை ஏன் வயலை அழிக்குது
எங்கும் மாசு எதிலும் மாசு எத்தனை விதத்திலே
புதிது புதிதாய் நோய்களும் கிருமிகளும் தோன்ற
சுகம் ஒன்றே குறியாய் சுயநலமே கொள்கையாய்
கோர தாண்டவம் ஆட தொலையுது எதிர்காலம்

கபட நாடகம்

2011-08-19T03:08:00.000-07:00

இறுக அணைத்த நிகழ்வு சரித்திரம்
எதிரியின் வஞ்சக தழுவல் கொல்வதற்காக
ஆயின் குத்திய குறுவாளை தடுத்தது
மராத்திய சிங்கம் அணிந்த இரும்பு கவசம்
எதிர்பார்த்திருந்த தாக்குதலுக்கு
பதிலடியாய் குடலை உருவியது
மதியூகியின் புலிநக ஆயுதம்
வியக்க வைக்கும் கபட நாடகம்

மாற்றம்

2011-08-18T19:35:00.001-07:00

அவனாக தேடிய துணை
தேளோ திரவியமோ
தீராத தலைவலியோ
சிரிக்கும் சிங்காரி உறவை
சிதைப்பாளோ சேர்ப்பாளோ
குலம் கோத்திரம் வேறு
கூடி வாழ வந்தது துணிவு
புது யுகத்தின் சூதாட்டம்
போகப் போகத் தெரியும்
பெற்றவர் பொறுப்பு சுருங்க
பறவைகள் சிறகை விரிக்க
அவசியமாகிவிட்ட மாற்றம்
அதிலில்லை ஏதும் குற்றம்

பெண்ணிவள்

2011-08-18T03:24:00.000-07:00

ஆரம்பம் எதுவென தெரியாமல்
அப்பாவி கணவன் தடுமாறுகிறான்
நிர்மலமான வானம் ஏன் கருத்தது
கடகடவென ஏன் இடித்தது
பளீரென ஏன் மின்னியது
கனமழை ஏன் கொட்டியது
பெண்ணிவள் புயலா பூகம்பமா
என்ன பிழை நான் செய்தேன்
குறை ஒன்றும் கூறவில்லை
வாதமும் புரியவில்லை
தடை ஏதும் சொல்லவில்லை
ஒன்றுமே புரியவில்லையே
இன்று நேற்றல்ல பல மாதம்
கடந்தும் கனன்று கொண்டிருக்கும்
என்றோ பேசியது செய்தது
எரிமலையை ஆராய்ந்து பயனுண்டோ

மருந்து

2011-08-17T19:40:00.000-07:00

நற நற சத்தம் நள்ளிரவில்
திடுக்கிட்டு விழித்தவளருகில்
அமைதியாய் தூங்கும் பிள்ளை
வயிற்றில் பூச்சி பிரச்சினையிது
வைத்தியரிடம் காட்டவேண்டும்
தருவார் இதற்கு தகுந்த மருந்து

திருவிழா

2011-08-17T07:19:00.001-07:00

இடி விழ மின்னல் வெட்ட மழை கொட்ட
ஒலி ஒளி வெள்ளமாய் பருவ கால திருவிழா
வெந்த பூமியும் நொந்த மனமும் குளிர
மேலும் இதுபோல் வரமாய் வருக தருக

இனிமை

2011-08-16T19:15:00.000-07:00

புரியுமா சாடை என அவளும்
தெரியுமா தாபம் என அவனும்
அது ஒரு அழகான ஊமை நாடகம்
எலியும் பூனையுமாய் வெளி வேடம்
கொடியும் கொம்புமாய் உண்மை பற்று
சம்சாரத்தின் இனிமை முரண்கள்தானே

தனி அடையாளம்

2011-08-16T06:41:00.001-07:00

சிகப்புத் தீற்றலால் திருமதியென அறிவித்தாள்
தாலியோடு அதையும் தைரியமாய் அழித்தாள்
தனக்கென தனி அடையாளம் தேடும் தன்னம்பிக்கைத்
தலைமுறையைப் பார்த்து விம்ம வேண்டும் பெருமையில்